يخرب بيت دى مكالمة

مساء الخير

مش عارف ليه الناس متعبة

جاتلى مكالمة تليفونية النهاردة فى الشغل حسيت بعدها ان دماغى وقفت عن التفكير و انها اللى هى دماغى فقدت القدرة على التمييز بين الاشياء و ان اعصابى بدأت تتبنج و يحصلها نوع من انواع البلادة و صوابعى مش نافع استخدمها على الكمبيوتر عشان اخلص الشغل اللى عندى

بعد المكالمة سالت نفسى

انا ايه اللى يجبرنى انى اشرح لحد حاجة المفروض انه فاهمها و انا المفروض مشرحهاش تانى اشرحها فى مدة تزيد عن الساعة و نص

مش عارف ليه الناس مش عايزة تشغل مخها

هل انا مضطر ان دايما ااكد على كلام قلته اكتر من مرة و مرتين

هل مضطر انى دايما ابقى قلقان عشان خايف انى الكلام اللى قلته فيه احتمال 80% انه يتنفذ غلط و بالتالى نعيد الشرح و الكلام الكتير

ليه مضطر انى اسمع قصص كتير ملهاش دعوة بالموضوع الاساسى لدرجة انى نسيت اسم اللى بيكلمنى و نسيت مشكلته ايه

ليه الكلام ميبقاش من مرة واحدة و الناس تفهمه من مرة واحدة و يتنفذ صح و بالتالى نتنقل للخطوة اللى بعديها

هنوفر وقت و صحة و مجهود و بالتالى هنطور و نفضى دماغنا من كلام فارغ بنضيع بيه و قتنا

ليه مش قادرين نفهم ان فى حاجة اسمها قواعد و اجراءات لازم نعملها عشان نوصل لهدف معين - باستثناء طبعا الاجراءات الحكومية لانها معمولة عشان تضايق الناس مش عشان تنجز مهمات -

دايما المصريين مصممين انهم يتشطروا و يدوروا على اى طريقة فهلوة عشان نعدى الاجراءات دى

نقعد نضيع وقت فى الكلام و المحاولات ان الحاجة تخلص مش صح و مش فى وقتها و بالفهلوة و كله يمشى فى حين ان لو اتبعنا الاجراءات من الاول كنا زماننا خلصناها و انجزناها و دورنا على اللى بعدها و هكذا

بجد المكالمة دى خلتنى اشتغل بعصبية و اغلط و اعصابى تتهز

انى اقعد اتعب فى نفسى و اخد من مجهودى ووقتى عشان اشرح معلومة لا تحتمل انها تاخد اكتر من دقيقتين اكررها انا اكتر من عشر مرات دا شىء صعب جدا

عشان كده احنا مش بنتقدم ابدا بنحب دايما نضيع وقت و نتفنن فى دا

كل واحد فاهم انه اذكى بنى ادم فى الدنيا و انه هو بس اللى بقدر يعمل كل حاجة صح

و باقى الناس دول رعاع و اغبياء مش فاهمين حاجة

يااااااااااااااااااااااه

دا انا لو كنت قدرت امسك اللى كلمتنى دى و اخبطها على بقها بشاكوش يااااااااه

انا عارف انى داوشكوا معايا بس بجد انا كنت هنفجر لو مطلعتش الغيظ اللى جوايا فى حد و ملقتش الا الكيبورد الغلبانة اللى اطلع عصبيتى عليها و اكتب الكلام دا

يللا ربنا يسامحها اللى كانت السبب فى ان الكيبورد تقريبا باظت

بصراحة انا عامل الموضوع اصلا عشان الم تمن الكيبورد دى

ايه دا ايه اللى ودانا فى السكة دى

اسف على الاطالة يا جماعة

سلام

يا سلام لو كل واحد خلاه فى حاله مكنش حد صعب عليه حاله

مساء الخير

مش عارف ليه الناس مصممة تدخل دايما جوه دماغ كل واحد و تحاول تعرف بكل الطرق ايه الموجود جوه مداخيل تلافيف جمجمته

من كام يوم اقعدت افكر انا ايه اللى جبنى هنا 

انا كنت مرتاح هناك و كافى شيرى خرى و كله تمام اللى خلانى اعملها و اتهبل و اجى هنا

الحكاية انى كنت شغال فى بلدى اللى هيا دمياط بلد الموبليا والمشبك و الجبنة و محدش يسألنى ايه علاقة الحاجات دى ببعض

المهم كنت شغال و مرتبى طبعا اى كلام بس كان شغل تعب و كده

قررت فجأة مع اول فرصة جتلى انى اوافق انى اشتغل فى القاهرة و من ساعتها و الناس مصممة تدخل فى دماغى و تمارس هوايتها المعتادة

من اول يوم فى القاهرة الكبرى الناس اللى اعرفهم بتحاول تحسسنى ان انا القروى السازج اللى بهرته اضواء المدينة مش عارف ليه

قاعد بتفرج على التلفزيون و مبسوط و الدنيا زى الفل و فجأة الاقى واحد يسالنى سؤال مفاجا غير متوقع او انا مكنتش مستعد ليه او ايا كانت المبررات

قالى انت عندك كام سنة 

جاوبت بكل تلقائية انا ان شاء الله على شهر 11 اللى جاى هكمل 23 سنة 

نظرة استغراب

انت خاطب او متجوز او بتحب

لا

ياراجل امال ايه 

ولا حاجة

مش بتفكر او مخطط لكده اكيد صح

مش عارف انا مش مخطط لكده فعلا بس عارف اكيد ان ميعاده لسه مجاش

لا ازاى الكلام دا مش صح يابنى انت على فكرة لما تتم الـ 23 دا معناه انك بقيت فى سنة الـ 24 يعنى انت دلوقتى عندك 24 سنة يابنى

ايه ياعم السنة الزيادة دى اللى طلعت فجأة ايه مشكلتك

ايه مشكلتك انت انت ازاى قاعد كده انت شايف الحياة ازاى

انا شايفها سهلة و بسيطة و كل شىء فى ميعاده و انا لما احس انى مستعد لحاجة و ناويها هبدأ اخططلها و الكلام دا انما انا عندى اولويات اعتقد انها اهم


اهم ايه يا عم لو كان شغل فيلعن ابو الشغل المهم النفس البشرية انت كائن حى و ربنا خلقك خليفته فى الارض مش عشان تشتغل بس يعنى من الاخر نفسك اهم من الشغل

انا معاك ان نفسى طبعا اهم من الشغل بس انا هقول كده و بعدين مشتغلش و اقعد استنى عدلى مثلا

لا بس شوف انت زى مقولتلك عندك 24 سنة و خلى بالك اهم سنتين تلاتة فى عمر اى شاب هما السنتين دول يعنى من 24 لحد 26 لانهم بيضيعوا هوا ليه بقا لان السنتين دول هما المنعطف الحقيقى فى حياتك لو انت مش هتخطط دلوقتى لحاجة معينة هتلاقى نفسك العمر جرى بيك و هتقول السنين اللى عدت دى راحت فين


يخرب بيت عقلك على اللى عايز يتكلم معاك ياعم انت واخد الامور بتعقيد ليه الدنيا ابسط من كده


من قال كده دى الدنيا دى معقدة جدا و الزكى هو اللى يقدر يتعامل معاها صح عشان ياخد منها اللى هو عايزه و يختم حياته صح لان اهم حاجة فى الدنيا هى الخواتيم


لا اله الا الله يا سيدى و الله انا مقتنع تماما ان الدنيا دى كلها متستهلش مننا دقيقتين تفكير


لا ازاى دا انت لازم تفكر و تفكر كويس جدا و تدقق فى كل حاجة عندك مثلا التجربة اللى عملوها عشان يعرفوا نشأة الارض قعدوا فيها كام سنة عشان بس يعرفوا 5 فى المية من مادة تكوين الكون

دا ايه علاقته بالموضوع المنيل دا

لازم تشوف الناس دى بتفكر ازاى مش اى تفكير دا تفكير اوى


ناس بتتعب و لازم يجتهدوا بس كل واحد و ليه فلسفته فى الحياة و الطريقة اللى بيحب يمشى عليها .. انا عن نفسى احب اخد الامور ببساطة و امشى دايما فى اى موضوع خطوة بخطوة و لما احلم احلم الحلم اللى ممكن احققه و ماحولش ابدا ان اكون صورة واضحة لحلمى الكبير البعيد اللى انا مش عارف عنه حاجة لان ببساطة انا مش متاكد منه و بالتالى مقدرش احطله تفاصيل و كده متعته هتروح لازم المستقبل يبقى غامض دايما عشان لما تقابل الحقيقة يبقى عندك مجال للتنازل لو ادت ضهرها ليك 
فاهم ولا ايه فى ليلتك دى

لا بس انا شايف انك مش مخطط لاى حاجة خالص و العمر هيجرى بيك و انت لسه مش مخطط لازم تلحق نفسك يبنى دى نصيحة 

انا فى اللحظة دى خلاص كنت هجيب اخرى و فضلت انى ابص فى الكمبيوتر و اعمل نفسى مركز فى حاجة

انا نازل اصلى العشا و لما اجى هنكمل كلامنا اوكى

اه اه طبعا دا انا كلى تفاؤل انى اكمل الحوار الشيق دا





مش عارف ليه فعلا كل واحد ميخليش حاله فى حاله يمكن يتصلح حاله

دى بس فضفضة على السريع قبل ما انام 

اه معلش انا حرف ال زال اللى هوه بعد الـ د مش شغال عندى فيمكن تلاقوا بعض الكلمات ركيكة شوية

اشوفكوا على خير ان شاء الله و لو عايزين نكمل مناقشة اوككى بس بلاش تفكرونى دايما انى عندى 24 سنة

يوووه اقصد 23

سلام

قعدة صباحى

السلام عليكم و رحمة الله و بركانه

امبارح كنت فى قعدة صفا كده مع اصحابى اللى من ثانوى و بصراحة هما دول اصحابى اللى ممكن اتكلم قدامهم بصراحة و مش بخجل منهم و براحتى خالص معاهم
المهم بغض النظر طبعا عن اسمائهم بس اللى كنت ملاحظه ان مستوى الحوار بينا اتغير خالص
فى ثانوى كنا بنتكلم فى حاجات متعلقة بمستقبلنا و بالجامعة و الجرى و البنات و الفلوس و كل دا
و فى الجامعة اتغير الكلام بس كان فى نفس المواضيع و ان اختلف شوية فى اسلوب الحوار و الاندفاع و الخ الخ الخ

اما القعدة بتاعت امبارح بقا كانت مختلفة تماما
كنا بنتكلم فى ايه تخيلوا

فى الجواز

اه و الله

حاجة مكنتش تخطر على بالى انا شخصيا فى الوقت دا على الاقل
بس لقينا نفسنا بنتكلم عن الجواز و الخطوبة و الاستقرار و بلا بلا بلا

انا فعلا اندهشت مش عارف الكلام دا المفروض ان لسه بدرى عليه ولا دا وقته فعلا

بصراحة القعدة بتاعت امبارح كان فيها مفاجات كتير على عكس خروجتنا كلها هبل و يأس و كلام فاضى

اتكلمنا فى الضياع اللى احنا فيه و الشغل اللى مش جايب همه و الخطوبة و الجواز اللى بنحلم بيه

و اتكلمنا ليه احنا لسه مكننا من سنة و 6 شهور يعنى من اول ما اتخرجنا من الكلية

هل العيب فينا و لا فى الناس و لا فى النظام ولا فى ايه ولا ايه ولا ايه

وصلنا لنتيجة هى عايمة شوية بس هى دى الحقيقة

الهدف

مش الهدف يعنى الجول
ااقصد الهدف من حياتنا ايه
بلاش الهدف من حياتنا دى كبيرة شويتين
اقصد حتى الهدف اللى احنا حاطينه قصادنا عشان نوصله و نشتغل و نجد عشان نحققه و نلاقى الوسائل الممكنة عشان نقرب منه و نشوفه كويس و نعيش فيه

فعلا كان دا اللى ناقصنا الهدف

اتكلمنا كتير و لفينا و دورنا بس كنا بنرجع لنفس النقطة

الهدف

ايه الهدف ان احنا نشتغل و يطلع عين ابونا شغل على شوية فلوس كلام فاضى مش بيكفوا حد
ايه الهدف ان انا او اى حد اقعد سنة او اتنين او 5 فى مكان مش طايقه عشان اخد خبرة و محدش عارف الخبرة هتفيدنى و لا لا لان انا مش عارف الهدف من الخبرة ايه

ايه الهدف ان احنا نفكر نتجوز و نخلف عشان ايه و لمين و ليه
ايه الهدف من ان احنا موجودين فى الاماكن دى فى التوقيت دا مع الناس دول
ايه الهدف

من الحياة

مش عايز حد يستغرب و محدش يقول ايه الفيلسوف دا ماله كده خانق علينا و على نفسه
انا بس بحكلكوا اللى حصل و اللى انا سرحت فيه كتير و بحاول اوصل لحل

مش مشكلة مين اللى بيقرا المقال دا على فكرة انا بكتب هنا عشان افرغ الشحنات و الطاقات و الكلمات المحشورة و صدقونى برتاح جدا

المهم عشان منروحش بعيد
اتكلمنا بصراحة فى امور كتير مقصرين فيها

زى دينا مثلا
الصلاة
الصدقة
الرضى
القدر


القدر ااااااااه من القدر
اللى يؤمن بيه يرتاح و اللى يفكر فيه يتعب و اللى مش بيصدقوا صدقونى بيموت على طول

يمكن يكون هو دا قدرنا
دلوقتى

ولا احنا اللى مش عارفين نختار صح

مش عارف موصلناش لنتيجة

بس عرفنا ان احنا مليانين اخطاء
اقصد خطايا

ممكن تتعالج او مع مرور الزمن ممكن تختفى او تكبر

المهم ان احنا لقينا نفسنا ناقصين هدف و الهدف محتاج و سيلة و الوسيلة مفقودة و المفقود مجهول و المجهول هو الغيب و الغيب عند الله ملك السماوات و الارض

القدر

بقول كلام كبير انا صح

معلش استحملونى شوية اصلى لسه بفكر فى الكلام بتاع امبارح

اكيد هقولكوا انا وصلت لايه

ولو مقلتش تعرف ان دا القدر

قدرى انى مقلكوش حاجة

سلام

سلام عليكم

دا هيبقى موضوعنا اليومى او الشبه يومى
تعليق على الاحداث اليومية
بس بطريقتى الخاصة جدا

طبعا اهم خبر فى رايى كان عن المفتى و تعليقه على غرق الشباب انهم مش شهداء و لا حاجة
بصراحة المفتى دا كل ما يقول حاجة او فتوى انا بشك فى صحتها على طول من اول تحليل فوايد البنوك و تحليل التامين بشتى انواعه و و و و الى فتواه بان الشباب اللى غرق مش شهداء و لكنهم جزم ما يستحقوش يعيشوا و هو دا جزائهم انهم حاولوا يهربو من الجنة اللى هما عايشين فيها و رموا نفسهم فى التهلكة !!!!!
سيادة المفتى عايش فى عالم تانى زيه زي ناس كتير اوى من المسئوليين عايشين فى عالم غير عالمنا
مش عارفين ان الشباب دول طالع عين ابوهم شغل اذا كانوا بيشتغلوا من الاساس بملاليم
النهارده عجبتنى مقالة لواحد فى الاهرام مش فاكر اسمه الصراحة دلوقتى كان بيتكلم عن المشكلة دى و قال كلام جامد اوى
منها ان الشباب مش طماع و لا حاجة بل بالعكس انه بيدور على ابسط حقوقه فى الحياة و هى انه يعيش مستور و بس

طيب تعالى حط نفسك مكان الشباب دول و على ايه بلاش تحط نفسك انت انا كفيل انى اوضحلك الصورة فانا بشكل من الاشكال بنتمى لنفس مشكلة الشباب دول و مش انا و بس دا كل الشباب بتاع الجيل الجديد جيل المستقبل هوو هوو شباب الجيل هوو هوو
شوف يا سيدى من الاول كده الواحد لما ييجى يتخرج من الجامعة و هو طبعا شايف قدامه الحياة سودا و متنيلة بستين نيلة من سياسة مش فاهمها لدين مش عارفه لتعليم متعلموش و كمان مهارات شغل عمره ما سمع عنها الى جانب الوسايط اللى قالبه دماغه من ساعة ما اتولد لحد ما هيموت و غيره و غيره و غيره من الحاجات اللى تجيب للواحد تفاؤل !!!
بيتخرج الشاب يا عين امه من دول و بمنتهى البراءة بعد ما يخلص جيشه بيدور على شغل زى اى بنى ادم طبيعى
شوف بقا الصدمة الكبرى
لما يلاقى كل الابواب متقفلة فى وشه و مفيش شغل و دا شىء طبيعى جدا بس اللى مش طبيعى انه لما حتى يلاقى شغل و غالبا يا اما مندوب مبيعات يا ااما بائع متجول هيقبض كام تخيل !!
ارقام فلكية فعلا 50 جنيه --- 100 جنيه --- قول 200 --- لا خليهم 400 جنيه و طبعا بيتحطله هدف معين من المبيعات لما يحققه هياخد العمولة اللى هو اصلا شغال عشانها و دا طبعا مش بيتحقق نهائى لان اصلا المنتج اللى بيبيعه عبارة عن نصب فى نصب
بالذمة دا مبلغ يعيش حيوان بلاش بنى ادم
يعنى لو حد مربى قطة فى البيت اكيد اكيد هيصرف عليها اكتر من 400 جنيه
دى حاجة ترضى ربنا
لما شاب بقاله اكتر من 20 سنة بيدرس و ابوه و امه صارفيين عليه دم قلبهم و فجاة يلاقى نفسه بيتعامل على انه انسان درجة تالتة و مش عارف حتى يصرف على نفسه بالذمة مطلوب منه يعمل ايه
انا مش بنكر ان فيه جزء من السلبية لكن الشباب اللى غرقوا دول كان املهم الوحيد انهم يلاقوا اى فرصة عشان يثبتوا انهم موجودين فى الحياة و انهم ليهم دور فى اى حاجة قبل ما يموتوا
بس للاسف ماتوا قبل حتى ما يوصلوا عشان يثبتوا اللى هما عايزين يثبتوه
و راح دم و عرق و مصاريف صرفوها عليهم ابوهم و امهاتهم
داب فى الميه
ذهب مع الريح
وحياة عنيك يا شيخ دول مايعتبروش شهداء بعد كل دا
و الله حرام عليك
كفاية كده النهارده احسن جالى اكتئاب
و خايف عليكم ليجيلكوا اكتئاب انتوا كمان
سلام

افتتاح المدونة

السلام عليكم

مش عايز اقول مقدمة طويلة و كلام مالوش لازمة
كل اللى هقوله ان المدونة بتاعتى الحمد لله تم افتتاحها النهارده
المدونة مالهاش تخصص معين بس ممكن نقول عليها مدونة شخصية تعبر عن رايى انا الشخصى فقط
بالطريقة بتاعتى انا و بس
مع احترامى للكل فرايى مختلف قليلا

ياريت المدونة تعجبكم